Dalam suatu penerbangan carteran yang membawa opa-opa dan oma-oma dari Manado, sehingga crew pesawat membuat kebijakan menerangkan tata penyelamatan dan peraturan-peraturan yang berlaku, dalam bahasa/logat Manado :
(Sekedar humor bagi teman2 semua, khususnya buat ngoni2 orang Manado dan yang bisa / ngerti Bahasa Manado)

Ledis en jentelmen,

Kalu rasa pidis tu mata, atau rasa bapongoh tu talinga, isap jo tu gula2!
Baku iko deng tu peraturan penerbangan, sekarang kita musti kase lia pa ngoni samua tu cara pake ini tali mamudung yang ada pa ngana pe pinggang, deng itu baju voor batobo, en masker oksigen kalu ngoni pe napas mulai hosa.

Supaya ngoni mo slamat, coba lia kwa kamari bagimana mo pasang itu sabuk yang balingkar pa ngoni pe pinggang, cara kunci supaya nyanda talapas, bekeng kancang deng bagaimana mo buka nanti.

Kalo sudah, itu baju batobo yang ada di bawah ngana pe tampa dudu jangan dulu pake kacuali nanti waktu Om Kapten so undang batobo pa torang rame-rame.
En inga ne…, itu barang jangan ngoni kase pindah neh, apalagi bawa pulang vor pajangan salon atau dekorasi souvenir ruang tamu tanda ngoni so pernah terbang. Kalu torang dapa riki, tong mo tampeleng pa ngana kiri kanang, muka belakang, deng atas bawah, mangarti?

De pe cara pake, itu baju kase lingkar pa ngana pe leher, awas jang talalu kancang komang, nanti so susa banapas kong flau, kong bekeng tasibu pa torang musti bekeng napas tiop-tiop ngoni pe mulu, idiiih, jadi bahati-ati neh!

Supaya boleh timbul di air, hela itu knop warna merah jambu bol, atau bole juga tiup de pe pipa, supaya tatimbul di air. Kong inga musti tunggu sampe so kaluar dari jandela darurat, baru boleh bekeng dia tabuka, dari kalu nyanda ngoni nanti ta prop di itu jandela atau pintu, bekeng pusing pa torang, kong kriting tong pe tangan nanti mo bahela pa ngoni macet di pintu, ododo e..

Oh yaa, amper lupa itu floit ngoni boleh pake barmaeng prit-pritan kalo so pastiu saat batobo di air.

Eh, asal ngoni tau samua ya, ini pesawat ada dua de pe pintu darurat di muka ada dua, di belakang ley ada dua, deng ada dua lagi jendela darurat di tengah-tengah. Jadi waktu kaluar nanti nyanda perlu baku rebe rupa burung weris baku rampas roti di pante waktu ada bapiknik, musti holopis rupa bebe atau bifi babaris bagitu, alias antri satu lein.

Kalu nanti tiba-tiba napas hosa bukang lantaran itu rim di pinggang talalu kancang, atau lantaran salah pasang itu baju batobo, masker oksigen mo taciri di atas ngoni pe kepala, no hela jo padia kong pasang diidong kong banapas rupa biasa jo.

Kalu ada anak kacili, ngoni yang so lebe tua tolong kase pake pa anak dulu baru pake sandiri, eh so salah, tabobale komaling, musti ngoni dulu pasang baru kase pasang pa itu kodomo! Inga ee..

Kartu gambar petunjuk vor keselamatan ada di popoji kursi di muka dimana ngana ada duduk akang, jangan ambe birman punya, jang ngoni baku cakar komang, deng baca bae-bae kong hafal mati pa dia.

Noh, bagitu jo dulu, Broer deng Zus! Semoga torang samua tarbang slamat sampe tujuan.. banya bardoa samua jang sampe torang mudung di lao !